Poslovne vesti - Makedonija

Индустриското производство во јуни намалено за 4,1 отсто

Индексот на индустриското производство во јуни 2012 година е намален за 4,1 отсто во однос на истиот месец лани, објави во петокот државниот завод за статистика.

Со ова индустриското производство во Македонија бележи пад десетти месец последователно, откако за последен пат во август минатата година беше евидентиран пораст на производството.

Индексот на индустриското производство во периодот јануари-јуни 2012 година, во однос на првото полугодие од претходната година бележи намалување за 6,9 отсто.

Според главните индустриски групи, производството во јуни 2012 година на годишно ниво бележи опаѓање кај Капитални производи за 18,9 отсто, Tрајни производи за широка потрошувачка за 47,7 отсто и Нетрајни производи за широка потрошувачка за 5,8 отсто, додека бележи пораст кај Енергија за 5,7 отсто и Интермедијарни производи, за 5,4 отсто.

Гледано по сектори, индустриското производство во секторот Рударство и вадење на камен во јуни 2012 година, во однос на јуни 2011 година, бележи пораст од 6,4 отсто, во секторот Преработувачка индустрија бележи опаѓање од 6,3 отсто, а во секторот Снабдување со електрична енергија, гас, пареа и климатизација пораст од 12,7 отсто, се вели во соопштението на Заводот за статистика.